Markel Olano Arrese

Joan den igandean Lazkaon alderdiko ekitaldi bat ospatu genuen eta Transizioaz geroztik Goierriko alkate eta zinegotzi izan direnak omendu genituen. Joseba Egibarrek egindako hitzaldian bizi dugun momentuaren, aro berri honen, garrantzia azpimarratu zuen. Nik neuk PSE-PP fronteari, udaletxe eta Foru Aldundietara inongo disimulurik gabe zabaltzeko asmoa duten fronte horri hain zuzen ere, aurre egin eta amaiarazi behar dugula nabarmendu nuen. Eta horretarako ezinbestekoa izango da egoera honekin ados ez gauden guztiok batu gaitezen.

Lazkaon etxean bezala sentitu nintzen, horrek esan nahi duen guztiarekin. Goierriko hainbat lagun, alderdikide eta senide ekitaldian izan ziren eta beti izaten da berezia horrelako “publikoarekin” aritzea. Baina oso ondo joan zen goiza — nahiz eta batzuen ustez gehiegi luzatu nintzen nire azalpenetan, eta aukera ederra izan genuen hala nahi izan zuten goierritarrei etorkizunean Gipuzkoarentzat dugun proiektua azaltzeko ere. Legealdi honetan egin bezala, datozen lau urteetan ere beharrezkoa dugu Gipuzkoan proiektu estrategikoak aurrera ateratzeko, eta azken batean gipuzkoar guztion ongizatea bermatzeko, lanean jarraitzea. Gogotsu eta ilusioz beteta gaude, eta aurrera egingo dugu!

Hona hemen Lazkaoko ekitaldiko argazki batzuk: